Na Mwandishi Wetu,Dar es Salaam
Makamu wa Rais wa Jamhuri ya Muungano wa Tanzania, Mhe. Deogratius Ndejembi, amezitaka taasisi zinazohusika na uwekezaji katika sekta ya mafuta na gesi asilia kuhakikisha wanawake na vijana wa Kitanzania wanapata fursa za ajira, mafunzo na zabuni katika miradi hiyo.
Ametoa wito huo Oktoba 28, 2026, jijini Dar es Salaam, wakati wa hafla ya utiaji saini leseni za utafutaji wa mafuta na gesi asilia, akisisitiza umuhimu wa kuwawezesha Watanzania kushiriki kikamilifu katika shughuli za kiuchumi zinazotokana na rasilimali hizo.
Ndejembi amesema ni muhimu kuimarisha ushiriki wa kampuni za Kitanzania katika mnyororo wa thamani wa sekta ya mafuta na gesi, ili ziweze kunufaika na fursa za kibiashara zinazotokana na uwekezaji huo.
Aidha, amesema Serikali ya Awamu ya Sita inalenga kuanzisha kituo cha umahiri kitakachosaidia kuendeleza ujuzi unaohitajika katika sekta ya mafuta na gesi asilia, hatua inayotarajiwa kuimarisha rasilimali watu na kuongeza uwezo wa wataalamu wazawa.
Ameeleza kuwa upatikanaji wa mafunzo, teknolojia na ujuzi maalumu ni muhimu katika kuwaandaa vijana wa Kitanzania kushiriki katika shughuli za utafutaji na uendelezaji wa rasilimali hizo, pamoja na kupanua uwezo wa kampuni za ndani kutoa huduma katika sekta hiyo.
Ndejembi amesisitiza kuwa taasisi na wadau wanaotekeleza miradi hiyo wanapaswa kuhakikisha fursa zinazotokana na uwekezaji zinawafikia Watanzania, huku utekelezaji wake ukizingatia uwajibikaji na maslahi ya taifa.
Hatua hiyo inalenga kuongeza ushiriki wa wananchi katika sekta ya mafuta na gesi asilia na kuweka msingi wa uchumi jumuishi unaozingatia maendeleo ya ujuzi na fursa za kiuchumi.
